31 Yanvar 2023, Çərşənbə axşamı - 11:44

Yadigar Məmmədov: “Məqsədimiz iştirak edəcəyimiz yarışlardan ölkəmizə medallarla qayıtmaqdır”

Qadın və qız boksçulardan ibarət Azərbaycan milli komandası təlim-məşq toplanışını davam etdirir. Baş məşqçi Yadigar Məmmədovun rəhbərliyi altında bir araya gələn yığma hazırlığı Bakı Boks Mərkəzində keçir.

Gündə 2 dəfə təşkil olunan məşqlərə liderlər cəlb edilib. Yanvarın 14-də başa çatacaq toplanışda əsas məqsəd milli üzvlərinin hazırkı durumu ilə tanışlıq xarakteri daşıyır.

Komandada əhval-ruhiyyənin yüksək səviyyədə olduğunu bildirən Məmmədovun sözlərinə görə, qarşıdakı beynəlxalq turnirlərdəki nəticələrə əsasən yığmanın yekun heyəti formalaşacaq: “Yanvarın 17-də Serbiyada 4 yaş qrupu üzrə beynəlxalq turnir başlayacaq. Yarışda 45-dək ölkənin iştirakı gözlənilir. Məktəblilər istisna olmaqla, hər yaş qrupundan çıxış edəcəyik. Yeniyetmələr, gənclər və böyüklərin mübarizəsində boksçularımızı yoxlayacağıq. Bu bizim üçün çox vacibdir”.

Baş məşqçi bildirib ki, bu il qadın boksçularımızı çox ciddi yarışlar gözləyir. O, əsas hədəfin Hindistanda baş tutacaq dünya çempionatı, Bakıda keçiriləcək U-22-lərin Avropa çempionatı və Paris-2024 Yay Olimpiya Oyunlarına lisenziya xarakterli turnirlərin olduğunu deyib: “Toplanışa 24 boksçu cəlb etmişik. Onların arasında Avropa çempionatlarının 5 mükafatçısı – qızıl, gümüş və bürünc medalçıları da hazırlıq keçir. Olimpiya Oyunlarına vaxtın az qalması və U-22-lər arasında Avropa çempionatının Bakıda keçirilməsi məsuliyyətimizi daha da artır. Qarşıda bizi dünya çempionatı da gözləyir. Buna görə də beynəlxalq yarışların nəticəsini nəzərə alıb seçim edəcəyik. Məqsədimiz iştirak edəcəyimiz yarışlardan ölkəmizə medallarla qayıtmaqdır”.

Qeyd edək ki, yığmamız Serbiyada beynəlxalq turnirdə 12 boksçu ilə təmsil olunacaq. Səfərə yollanacaq heyət toplanışın son günündə açıqlanacaq.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Azərbaycan Boks Federasiyası

Azərbaycan Boks Federasiyası